МОНГОЛ УЛС ВЬЕТНАМ УЛСЫН ХУДАЛДААНЫ БОДЛОГЫН ХЭЛЭЛЦҮҮЛЭГТ ОРОЛЦОВ

Швейцарын Холбооны Улсын Женев хотноо 2026 оны 11 дүгээр сарын 4, 6-ны өдрүүдэд Дэлхийн худалдааны байгууллага (ДХБ)-ын Худалдааны бодлого хянах байгууллагын хуралдаанаар Бүгд Найрамдах Социалист Вьетнам Улсын худалдааны бодлогын гурав дахь удаагийн хяналт, хэлэлцүүлгийг зохион байгуулж байна.

Монгол Улсаас НҮБ-ын Женев дэх төв, ДХБ болон олон улсын бусад байгууллагын дэргэд суугаа Байнгын төлөөлөгчийн газрын төлөөлөл 11 дүгээр сарын 4-ний өдрийн хэлэлцүүлэгт оролцож, Вьетнам Улсын худалдааны бодлогын талаар манай улсын байр суурийг илэрхийлж үг хэлэв.

Монгол Улсын төлөөлөгч Вьетнам Улсын эдийн засгийн тогтвортой өсөлт, худалдаа, хөрөнгө оруулалтын орчны шинэчлэл, дэлхийн нэмүү өртгийн сүлжээнд нэгдэх чиглэлээр гаргасан ахиц дэвшлийг сайшаав. Түүнчлэн ДХБ-ын Худалдааг хөнгөвчлөх хэлэлцээрийн хэрэгжилт, гаалийн үйл ажиллагааны цахимжилт, худалдааны зардлыг бууруулах чиглэлээр авч хэрэгжүүлж буй арга хэмжээг онцлон тэмдэглэв.

Мөн Вьетнам Улсын дүрэмд суурилсан олон талт худалдааны тогтолцоог бэхжүүлэх, ДХБ-ын шинэчлэлд оруулж буй хувь нэмрийг өндрөөр үнэлж, хоёр улсын худалдаа, хөрөнгө оруулалт, логистик, цахим худалдааны салбарын хамтын ажиллагааг цаашид өргөжүүлэхийн чухлыг илэрхийлэв.