ЦАХИМ ХУДАЛДААН ДАХЬ ЭКСПОРТЛОГЧ ЭМЭГТЭЙЧҮҮДИЙН САНГИЙН ТӨСЛИЙГ МОНГОЛ УЛСАД ХЭРЭГЖҮҮЛНЭ
Дэлхийн худалдааны байгууллага (ДХБ), Олон улсын худалдааны төв (ОУХТ), Цахим худалдаан дахь экспортлогч эмэгтэйчүүдийн сан (Women exporters in the Digital economy- WEIDE)-гаас бизнес эрхлэгч эмэгтэйчүүдийг чадавхжуулах, дэмжлэг үзүүлэх төслийн Анхдугаар үе шатыг дэлхийн дөрвөн улсад хэрэгжүүлэхээр сонгон шалгаруулсныг өнөөдөр албан ёсоор зарлалаа.
Тус төслийн сонгон шалгаруулалтад дэлхийн улс орнуудаас 600 гаруй мэдүүлэг ирүүлснээс Монголын Үндэсний Худалдаа Аж Үйлдвэрийн Танхимын SheTrades Mongolia Hub санаачилга шалгарч, Монгол Улс энэхүү төслийг хэрэгжүүлэх анхны дөрвөн улсын тоонд (Монгол Улс, Доминиканы Бүгд Найрамдах Улс, Иорданы Хашимитын Хаант Улс, Холбооны Бүгд Найрамдах Нигери Улс) багтав.
Жижиг, дунд бизнес эрхлэгч эмэгтэйчүүдийг дэмжих, цахим худалдаан дахь оролцоог нь нэмэгдүүлэх замаар бүс нутгийн болон олон улсын зах зээлд бараа бүтээгдэхүүнээ экспортлох боломжийг бүрдүүлэх зорилготой энэхүү төслийн хүрээнд эдгээр 4 улсаас тус бүр 100 эмэгтэйг сонгож, санхүүгийн болон техникийн туслалцааг хоёр жилийн хугацаанд үзүүлэх юм.
Ёслолын арга хэмжээг нээн ДХБ-ын Ерөнхий захирал Нгози Оконжо Ивеала, ОУХТ-ийн Гүйцэтгэх захирал Памела Күүк Хамилтон нар үг хэлж, тус төслийг эхлүүлэхэд үнэтэй хувь нэмэр оруулсан гол хандивлагч Арабын Нэгдсэн Эмират Улс, Катарын Хаант Улс, Олон Улсын Хөлбөмбөгийн Холбоонд талархал илэрхийлээд, сонгогдсон дөрвөн улсад энэхүү төсөл амжилттай хэрэгжинэ гэдэгт итгэлтэй байгаагаа тэмдэглэв.
Монгол Улсыг төлөөлж Байнгын төлөөлөгч, Элчин сайд Д.Гэрэлмаа хэлсэн үгэндээ Монгол Улсын эдийн засгийн нөхцөл байдлыг товч танилцуулж, эмэгтэй бизнес эрхлэгчдийн тоо нэмэгдэж буйг дурдан, тэднийг чадавхжуулах, бодит дэмжлэг үзүүлэх, олон улсын зах зээлд нэвтрэх, цахим худалдаанд идэвхтэй оролцох боломжийг бий болгох нь нэн чухал болохыг онцолж, ДХБ, ОУХТ, хандивлагч орнуудад гүн талархал илэрхийллээ.
Монгол Улсын хэмжээнд жижиг, дунд бизнес эрхлэгчдийн 68%-ийг эмэгтэйчүүд эзэлж байгаа бөгөөд МҮХАҮТанхимаас ОУХТөвтэй хамтран 2023 оны 6 дугаар сард үүсгэн байгуулсан SheTrades Mongolia Hub-ын үйл ажиллагаа өргөжиж, 900 гаруй эмэгтэйг эгнээндээ нэгтгэн, эмэгтэй бизнес эрхлэгчдийг дэмжих олон төрлийн төсөл хөтөлбөр, сургалт, арга хэмжээг амжилттай, үр дүнтэй зохион байгуулж буйг сонгон шалгаруулах комисс өндрөөр үнэлсэн байна.