images

НҮБ-ЫН ХҮНИЙ ЭРХИЙН ЗӨВЛӨЛИЙН ЭЭЛЖИТ 58 ДУГААР ЧУУЛГАНЫ ҮЕЭР САНАА НЭГТ ОРНУУДТАЙ ХАМТРАН ХЭЛЭЛЦҮҮЛЭГ ЗОХИОН БАЙГУУЛАВ

Мэдээ мэдээлэл

2025-02-26

121

НҮБ-ын Хүний эрхийн зөвлөлийн 58 дугаар чуулганы үйл ажиллагаа 2025 оны 2 дугаар сарын 24-ний өдөр Женев хотноо эхэллээ. Ээлжит чуулганаар хүний эрхийн өргөн хүрээтэй асуудал, түүний дотор Бээжингийн тунхаглал, түүний үйл ажиллагааны хөтөлбөр батлагдсаны 30 жилийн ой, цаазаар авах ялыг халах, хүүхдийн эрх, хөгжлийн бэрхшээлтэй хүмүүсийн эрх, арьс үндсээр алагчилахын эсрэг олон улсын өдрийг тэмдэглэх зэрэг асуудлаар нийт 8 панел хэлэлцүүлэг явуулж, НҮБ-ын Хүний эрхийн Дээд комиссарын алба, Хүний эрхийн зөвлөлийн 31 тусгай мандат эзэмшигч нарын үйл ажиллагааны илтгэлийг тус тус сонсож, хэлэлцүүлэг өрнүүлнэ.
 
Чуулганы албан ёсны үйл ажиллагаанаас гадна улс орнууд болон бусад байгууллагын зүгээс 150 гаруй дагалдах арга хэмжээ-хэлэлцүүлэг зохион байгуулахаар төлөвлөөд байна. Энэ хүрээнд НҮБ-ын Хүний эрхийн зөвлөлийн цаазаар авах ялын асуудлаарх тогтоол санаачлагч үндсэн бүлгийн гишүүн улсууд болох Бельги, Бенин, Коста Рика, Мексик, Молдав, Монгол, Швейцар, Франц Улсын Байнгын төлөөлөгчийн газрууд болон Оксфордын Их сургуулийн Цаазаар авах ялыг халах асуудлаарх судалгааны нэгж (DPRU), Death Penalty Project олон улсын ТББ нар хамтран 2 дугаар сарын 25-ны өдөр цаазаар авах ялыг халах асуудлаар тусгайлсан арга хэмжээ зохион байгуулав.
Уг арга хэмжээнд Швейцарын Гадаад хэргийн яамны Хүний эрхийн асуудал хариуцсан газрын дарга Р.Гашуд, Оксфордын Их сургуулийн Цаазаар авах ялыг халах асуудлаарх судалгааны нэгжийн захирал, профессор К.Хойл, тус нэгжийн Төслийн менежер Д.Каллен, Death Penalty Project ТББ-ын үүсгэн байгуулагч, Гүйцэтгэх захирал П.Жаббар, Мидлсексийн Их сургуулийн олон улсын эрх зүйн профессор В.Шабас болон НҮБ-ын Хүний эрхийн Дээд комиссарын албаны Ардчилал, эрх зүйт ёсны хэлтсийн дарга С.Валкер нар илтгэгчээр оролцож, цаазаар авах ялыг хууль тогтоомжоор халаагүй ч практикт багадаа 10-аас доошгүй жил хэрэглээгүй орнууд буюу де факто халсан орнууд, тэдгээрийн нөхцөл байдал, цаазаар авах ялыг бүрмөсөн халахад тулгарч буй саад, хориг, түүнийг даван туулахад олон улсын хамтын нийгэмлэгийн зүгээс үзүүлэх боломжтой дэмжлэг, туслалцааны талаар хэлэлцлээ. Хэлэлцүүлэгт Женевт суугаа Байнгын төлөөлөгчийн газрууд, судлаачид, иргэний нийгмийн 40 гаруй төлөөлөгч оролцлоо.