ЗЭВСЭГ ХУРААХ БАГА ХУРЛЫН ӨНДӨР ТҮВШНИЙ ХЭЛЭЛЦҮҮЛЭГТ ҮГ ХЭЛЭВ

Монгол Улсаас НҮБ-ын Женев дэх төв болон олон улсын бусад байгууллагын дэргэд суугаа Байнгын төлөөлөгч, Элчин сайд Д.Гэрэлмаа 2 дугаар сарын 26-ны өдөр Зэвсэг хураах бага хурал (ЗХБХ)-ын өндөр түвшний хэлэлцүүлэгт оролцож, олон улсын энх тайван, аюулгүй байдал, зэвсэг хураах чиглэлээр Монгол Улсын Засгийн газраас баримталж буй бодлогын талаар үг хэлэв.

Байнгын төлөөлөгч, Элчин сайд Д.Гэрэлмаа хэлсэн үгэндээ цөмийн зэвсгийг бүрэн устгах нь олон улсын энх тайван, аюулгүй байдал, зэвсэг хураах чиглэлээр баримталж буй Монгол Улсын энэ тэргүүний зорилго болохыг тэмдэглээд, энэ хүрээнд Монгол Улсын Их Хурал Бага хэмжээний цөмийн материалын шинэчилсэн протоколыг 2024 оны 12 дугаар сард соёрхон баталсан талаар мэдээлж,  цөмийн зэвсэгтэй улсууд цөмийн зэвсэггүй улсуудын эсрэг цөмийн зэвсэг хэрэглэхгүй, хэрэглэхээр сүрдүүлэхгүй байхад чиглэсэн сөрөг аюулгүй байдлын баталгааг олгох нь нэн чухал болохыг илэрхийлэв.

Мөн ЗХБХ сүүлийн 20 гаруй жилийн хугацаанд үндсэн үүрэг буюу зэвсэг хураах асуудлаарх олон талт гэрээ, хэлэлцээрийн төслийн хэлэлцээг эхлүүлж чадахгүй байгааг онцлоод тус бага хурлын үйл ажиллагааг гацаанаас гаргахын тулд гишүүн улсуудын улс төрийн хүсэл зориг ихээхэн чухал болохыг тэмдэглэв.

ЗХБХ нь зэвсэг хураах асуудлаар 1978 онд болсон НҮБ-ын Ерөнхий Ассамблейн тусгай чуулганы дүнд зэвсэг хураах асуудлыг хэлэлцэх олон улсын хамтын нийгэмлэгийн цорын ганц чуулган хэмээх статустайгаар 1979 онд байгуулагдсан ба тус байгууллагын хүрээнд зэвсэглэлийг хорогдуулах, зэвсэг хураах асуудлаар голлох олон талт гэрээ хэлэлцээрийг байгуулж байсан болно.