ОЛОН УЛСЫН БАЙГУУЛЛАГУУДЫН УДИРДЛАГАТАЙ УУЛЗАЛТ ХИЙВ

ГХЯ-ны Төрийн нарийн бичгийн дарга Н.Анхбаяр ШХУ-д ажиллах үеэрээ Женевт төвтэй Олон улсын зарим байгууллагын удирдлагуудтай уулзлаа.

Дэлхийн худалдааны байгууллагын Ерөнхий захирлын орлогч Жан Сянчен-тай хийсэн уулзалтаар өнгөрсөн 2 дугаар сард АНЭУ-ын Абу Даби хотноо хуралдсан Дэлхийн худалдааны байгууллагын Сайд нарын 13 дугаар Бага хурлын үр дүн, олон талт худалдааны бодлого, түүний хүрээнд өрнөж буй цаг үеийн асуудал, Монгол Улс, ДХБ-ын хооронд хөгжүүлж буй хамтын ажиллагааны асуудлаар дэлгэрэнгүй санал мэдээлэл солилцлоо. Түүнчлэн далайд гарцгүй хөгжиж буй орнуудын өмнө тулгарч буй онцлог бүхий сорилтууд, тэдгээрийг даван туулах чиглэлээр хамтран судалгаа хийх, түүний дотор Улаанбаатарт төвтэй ДГХБО-ын Олон улсын судалгааны төвтэй хамтран ажиллах боломжийн талаар ярилцав.

Олон Улсын Улаан Загалмайн хорооны Ерөнхийлөгч Миряана Эггертэй уулзаж, тус байгууллагатай хөгжүүлж буй хамтын ажиллагаа, дэлхий дахинд өрнөж буй үйл явдал, олон улсын хүмүүнлэгийн тусламж зэрэг асуудлаар ярилцав. ОУУЗХ-ны Ерөнхийлөгч Монгол Улсад болсон зудын гамшигт сэтгэл зовниж байгаагаа илэрхийлсний зэрэгцээ Монгол Улстай боломжит бүхий л чиглэлээр хамтран ажиллахаа нотлов.