“GENEVA OPEN 2023” УЛАМЖЛАЛТ ШАТРЫН ТЭМЦЭЭН АМЖИЛТТАЙ ЗОХИОН БАЙГУУЛАГДАВ

“Geneva open 2023” шатрын аварга шалгаруулах уламжлалт тэмцээнийг Швейцарын Холбооны Улсад үйл ажиллагаа явуулж буй “GM-STAR” спорт клуб, Монгол Улсаас Швейцарын Холбооны Улсад суугаа Элчин сайдын яам, “Женевийн монгол хүүхдийн нийгэмлэг”, Швейцар-Монголын нийгэмлэг, ASMR нийгэмлэг хамтран энэ сарын 05-ны өдөр Женев хотноо зургаа дахь жилдээ амжилттай зохион байгууллаа.

Тус тэмцээнд оролцогчдын тоо, цар хүрээ жил бүр өргөжиж, энэ удаа 70 орчим тамирчин оролцон оюун ухаан, авхаалж самбаагаа сорьсноос өсвөрийн шатарчдын 9-11 насны ангиллын Тэргүүн байрт Н.Тэнгис, 2 дугаар байрт М.Эрдэнэбилэг, 3 дугаар байрт Ц.Ананд, мөн өсвөр насны 12-15 насны ангиллын Тэргүүн байрт Б.Тамир, 2 дугаар байрт С.Тэлмэн, 3 дугаар байрт Ж.Цогтбаатар нар шалгарав. Насанд хүрэгчдийн ангиллын тамирчдаас Э.Төрбат Тэргүүн байрт, Р.Баярсайхан 2 дугаар байрт, Dan Hanouna 3 дугаар байрт тус тус шалгарлаа.

Энэ онд Женев хотноо үйл ажиллагаагаа эхлүүлсэн Шатрын сургалтын төвийн 18 бяцхан тамирчин анх удаа тэмцээнд оролцож, Тэргүүн байрт А.Жюли, 2 дугаар байрт Е.Ханхүү, 3 дугаар байрт Ж.Эрхсаран нар шалгарав. Тэргүүн байрт шалгарсан хүүхэд багачуудад Байнгын төлөөлөгч, Элчин сайд Д.Гэрэлмаа, тэмцээний ивээн тэтгэгч "Даниел Грузов" ХХК-ийн захирал Оюун-Эрдэнэ Грузов нар "Хаан шатар" ХХК-ийн "Цодгор хүү" шатрын шилмэл бүтээгдэхүүнийг дурсгаж, өсвөр насны нийт тамирчдад ЭСЯ-ны гарын бэлгийг гардуулав.

Олон зуун жилийн түүхтэй оюуны спортыг түгээн дэлгэрүүлэх, хүүхэд залууст таниулах зорилготой “Geneva Open 2023” шатрын аварга шалгаруулах тэмцээний ерөнхий зохион байгуулагч, “GM-STAR” спорт клубын захирал Л.Батчулуун, зочин шүүгч Ж.Хулан, Монголын Шатрын холбооны Европ дахь салбар зөвлөлийн тэргүүн П.Даваадэмбэрэл, нийт тамирчид, хөгжөөн дэмжигчид, ивээн тэтгэгч байгууллага, иргэд, хамтран зохион байгуулагчдад ЭСЯ-ны зүгээс баяр хүргэж, спортын өндөр амжилт хүсэн ерөөж байна.