ИТГЭМЖЛЭЛ ОЛГОХ
2023-08-31
Швейцарын Холбооны Улсад байгаа Иргэн та өөрийн эрх, хийхийг хүсэн үйлдэл, өөрийн өмчлөлийн орон сууцаа бусдад худалдах эрхээ шилжүүлэх, банканд данс нээлгэх гэх мэт үйлдлийг өөрөө бус, Монгол Улсад байгаа өөрийн төлөөлөгчөөр буюу итгэмжлэгдэгчээр дамжуулан эдлэх, эсхүл хийх боломжтой. Монгол Улсын Иргэний хуулийн 62 дугаар зүйлийн 62.3-д заасны дагуу таныг төлөөлөх итгэмжлэгдэгчийн эрх хууль тогтоомжийн дагуу (тухайлбал насанд хүрээгүй хүүхдийг төлөөлөх эцэг, эхийн эрх) болон итгэмжлэлийн үндсэн дээр үүсдэг. Итгэмжлэл гэрчлүүлэхдээ тодорхой эрх, үүргийг шилжүүлсэн итгэмжлэлийг шаардлага хангахуйц байдлаар бичиж, дараах материалыг бүрдүүлсэн байна.
Дараах материалыг бүрдүүлж, өөрийн биеэр авчрах:
- Монгол Улсын гадаад паспорт, эсхүл иргэний үнэмлэхийн эх хувь, түүний хуулбар (хамтран өмчлөгч эрхээ шилжүүлэх бол өмчлөгч бүрийн бичиг баримт),
- 18 нас хүрээгүй хүүхдийн өмнөөс итгэмжлэл гаргах бол хүүхдийн бичиг баримт, түүний хуулбар,
- Орон сууц, үл хөдлөх хөрөнгөтэй холбоотой итгэмжлэл гэрчлүүлэх бол үл хөдлөх хөрөнгийн улсын бүртгэлийн гэрчилгээ,
- Итгэмжлэлийн үйлчилгээ авахаар ЭСЯ-д ирэхийн өмнө https://consul.notary.mn/login сайтаар нэвтрэн хэрэглэгчийн бүртгэл үүсгэж, итгэмжлэлийн маягтын холбогдох хэсгийг цахимаар бөглөн тус ЭСЯ-д урьдчилан илгээнэ үү.
- Үйлчилгээний хураамж төлсөн баримт (үйлчилгээний хураамж цэснээс харна уу)
Зөвлөгөө:
- Итгэмжлэл үйлдэгч итгэмжлэлийн агуулга, үр дагаврыг ойлгож, уншиж танилцсан ба бусдын дарамт шахалт, бусад хүчин зүйлд авталгүйгээр, хүсэл зоригоо илэрхийлэн үйлдэж буйг ойлгоно.
- Итгэмжлэлийг зөвхөн кирилл үсгээр бичнэ.
- Итгэмжлэлийн хүчинтэй байх хугацааг тодорхой бичих бөгөөд 3 сараас 3 хүртэлх жил байж болно.
- Итгэмжлэлд төлөөлүүлэгч, төлөөлөгч нарын ургийн овог, регистрийн дугаар, утас дугаар зэргийг зөв бичсэн байна.
- Таны итгэмжлэл ажлын 1 өдрийн дотор Нотариатын системд бүртгэгдэж, монголд хүргэгдэнэ.
- Итгэмжлэл олгох иргэн өөрийн биеэр ирж, хувийн байдлаа тогтоолгох, иргэний бичиг баримтын бүрэн байдлыг хангах үүрэгтэй.
- Итгэмжлэлийг цахим шуудан, илгээмжээр хүлээн авахгүй.
- Итгэмжлэгдэгч өөрт ойрхон байрлах дурын нотариатын газраас иргэний бичиг баримттайгаа өөрийн биеэр очиж итгэмжлэлээ авна.
- Итгэмжлэлийн зүүн доор буланд байрлах QR кодоор итгэмжлэлийг авах тул гэрчлүүлсэн итгэмжлэлийг QR кодыг төлөөлөгчдөө өгөх шаарлагатай.
