МОНГОЛЫН УЛАМЖЛАЛТ ЦАГААН САРЫН БАЯРЫГ ТЭМДЭГЛЭЛЭЭ

Монгол Улсаас Швейцарын Холбооны Улсад суугаа ЭСЯ-наас энэ сарын 12-ны өдөр Монголын уламжлалт Цагаан сарын баярыг тохиолдуулан Швейцарын болон олон улсын байгууллагын зарим ажилтан, Монголд үйл ажиллагаа явуулдаг зарим байгууллагын 20 гаруй зочин, төлөөлөгчдөд ЭСЯ-ны ажилтнууд монгол өв соёл, мэндлэх золгох ёс, монгол идээ, цагаан сарын түүх уламжлал, ёс заншлын талаар танилцуулах арга хэмжээ зохион байгуулав. Залуу уран бүтээлч Д.Мандахжаргал морин хуур, хөөмийн үзүүлбэрийг франц хэлээр танилцуулан толилуулж, монгол бийрэн бичлэгийн ур чадварыг уран бүтээлч Уранчимэг үзүүлэн, зочдод дурсгал болгон гардуулав. 

Элчин сайд Д.Гэрэлмаа хүрэлцэн ирсэн зочдод энэ жил тохиож буй Монгол Улс, Швейцарын Холбооны Улсын хооронд дипломат харилцаа тогтоосны 60 жилийн ойн баярын мэндийг дэвшүүлж, хоёр улсын хооронд бат бэх гүүр болж, харилцаа, хамтын ажиллагааг хөгжүүлэхэд үнэтэй хувь нэмэр оруулж ирсэнд гүн талархал илэрхийлж, айлчлан ирж буй Хөх луу жилд аз жаргал, эрүүл энх, амжилт бүтээлээр дүүрэн байхын ерөөл дэвшүүлэв.